நீங்கள் தேடியது "விருதுநகர் கலெக்டர்"

ஸ்ரீவில்லிபுத்தூர்:

பாராளுமன்ற தேர்தல் தேதி அறிவிக்கப்பட்டுள்ளதால் நடத்தை விதிமுறைகள் அமலுக்கு வந்துள்ளன. ஸ்ரீவில்லிபுத்தூர் ஆண்டாள் கோவிலில் புராணங்களை விளக்கக்கூடிய ஓவியங்கள் மற்றும் பல்வேறு வகையான பூக்கள் நுழைவு வாயில் மற்றும் உள் பிரகாரத்தில் வரையப்பட்டிருந்தது.

அதில் தாமரைப்பூக்கள் பாரதிய ஜனதா கட்சியின் சின்னம் என கருதிய ஸ்ரீவில்லிபுத்தூர் போலீஸ் துணை சூப்பிரண்டு ராஜா நடத்தை விதிமுறைகளை காரணம் காட்டி அதனை அழிக்குமாறு கோவில் செயல் அலுவலரிடம் கூறி உள்ளார்.

இதனைத்தொடர்ந்து கோவில் பணியாளர்கள் சுண்ணாம்பு கலவையால் தாமரை பூ சின்னத்தை அழித்தனர். அந்த இடத்தில் வேறு கோலம் வரையப்பட்டது. இதற்கு இந்து அமைப்புகள் மற்றும் பக்தர்கள் கண்டனம் தெரிவித்தனர்.

ஸ்ரீவில்லிபுத்தூர் ஆண்டாள் கோவிலில் ஓவியங்கள் அழிக்கப்பட்டது குறித்து விருதுநகர் கலெக்டரும், தேர்தல் அதிகாரியுமான சிவஞானத்திடம் கேட்டபோது, ஆண்டாள் கோவிலில் தாமரை பூ கோலம் அழிக்கப்பட்டது குறித்து விசாரித்து வருகிறோம்.

கல்வி நிறுவனங்கள் மற்றும் வழிபாட்டு தலங்களில் பிரசாரம் செய்வதற்கு மட்டுமே தடை விதிக்கப்பட்டுள்ளது. கோவிலில் நிரந்தரமாக போடப்பட்ட பெயிண்ட் கோலத்தை அழித்திருக்க வேண்டிய அவசியம் இல்லை.

தாமரை சின்னம் தேர்தல் கட்டுப்பாட்டு விதிகளுக்குள் வரக்கூடும் என கோவில் நிர்வாகத்திடம் போலீஸ் டி.எஸ்.பி. அறிவுரைதான் கூறியுள்ளார். கோவில் நிர்வாகத்தினர்தான் கோலங்களை அழித்துள்ளனர். யாரும் கோவில் நிர்வாகத்திடம் வற்புறுத்தவில்லை. தாமரை பூ கோலம் அழிக்கப்பட்டதில் உள்நோக்கம் எதுவும் இல்லை என்றார். #LSPolls SrivilliputhurTemple

விருதுநகர்:

விருதுநகர் மாவட்ட கலெக்டர் அலுவலக கூட்டரங்கில், சென்னை உயர்நீதிமன்ற தீர்ப்பின் இடைக்கால உத்தரவின் அடிப்படையில், டிஜிட்டல் போர்டு, பிளக்ஸ், விளம்பர பதாகைகள் வைப்பதற்கான வழிகாட்டு நெறிமுறைகள் குறித்த ஆலோசனைக் கூட்டம் கலெக்டர் சிவஞானம் தலைமையில் மாவட்ட காவல் கண்காணிப்பாளர் ராசராஜன் முன்னிலையில் நடந்தது.

டிஜிட்டல் போர்டு, பிளக்ஸ், விளம்பர பதாகைகள் வைப்பதற்கான பின்பற்ற வேண்டிய வழிகாட்டு நெறிமுறைகள் குறித்து எடுத்துரைக்கப்பட்டன.

சென்னை உயர்நீதிமன்ற வழக்குகளில் வழங்கிய இடைக்கால உத்தரவின் அடிப்படையில் டிஜிட்டல் போர்டு, பிளக்ஸ், விளம்பர பதாகைகள் போன்றவைகளால், சாலையினை பயன்படுத்துவோர் மற்றும் வாகன ஒட்டிகளிடம் கவன சிதறலை ஏற்படுத்துவதாலும் சாலையினை பயன்படுத்தும் பொதுமக்களுக்கு இடைஞ்சல் ஏற்படுத்துவதாலும் விருதுநகர் மாவட்டத்திலுள்ள இணைப்புச் சாலைகள், சாலை சந்திப்புகள் பிளாட்பாரங்கள், நடைபாதைகள் மற்றும் மாவட்டத்திலுள்ள முக்கிய சாலைகள், வழிபாட்டு தலங்கள், மருத்துவமனை அருகில் மற்றும் சுற்றுலா முக்கியத்துவம் வாய்ந்த இடங்கள் போன்றவற்றில் அங்கீகாரம் பெற்ற மற்றும் பதிவு செய்யப்பட்ட அரசியல் கட்சிகள், திருவிழாக்கள் மற்றும் திருமண நிகழ்ச்சிகள் சார்பில் அனுமதியின்றி டிஜிட்டல் போர்டு, பிளக்ஸ், விளம்பர பதாகைகள் வைப்பதற்கு இடைக்கால தடை விதிக்கப்பட்டுள்ளது.

தேவையான சமயங்களில் மட்டும் டிஜிட்டல் பேனர்கள் வைக்க வேண்டும். எந்த இடத்தில் வைக்க வேண்டும், யாரிடம் அனுமதி பெற வேண்டும், அவற்றை எப்பொழுது அனுமதிக்கு விண்ணப்பிக்க வேண்டும் என்பதை அனைவரும் நன்றாக அறிந்திருக்க வேண்டும். விண்ணப்பங்கள் கணினியில் பதிவேற்றம் செய்யப்படுவதால், வெளிப்படை தன்மை உள்ளது.

எனவே, விருதுநகர் மாவட்டத்தில் டிஜிட்டல் போர்டு, பிளக்ஸ், விளம்பர பதாகைகள் வைப்பதற்கு முன்பு சம்மந்தப்பட்ட துறை அலுவலர்களிடமிருந்து முறையாக அனுமதி பெற வேண்டும். அச்சக உரிமையாளர்கள் டிஜிட்டல் போர்டு, பிளக்ஸ், விளம்பர பதாகைகள் பிரிண்ட் செய்ய வரும் நபர்களிடம் உறுதிமொழி பெற வேண்டும்.

விதிகளுக்கு முரணாக பேனர், விளம்பர பதாகைகள் மற்றும் பிளக்ஸ் வைத்திருப்பது கண்டறியப்பட்டால் ரூ. 5000 அபராதம் அல்லது ஒரு வருட சிறைத்தண்டனை அல்லது அபராதம் மற்றும் சிறை தண்டனை ஆகிய இரண்டும் வழங்கப்படும்.

இவ்வாறு அவர் பேசினார்.

கூட்டத்தில், அனைத்து கோட்டாட்சியர்கள், வட்டாட்சியர்கள், நகராட்சி ஆணையாளர்கள், அனைத்து கட்சி பிரமுகர்கள், விளம்பர அச்சக உரிமையாளர்கள் உட்பட அரசு அலுவலர்கள், காவல் துறையினர்கள் பலர் கலந்து கொண்டனர். #tamilnews

விருதுநகர்:

விருதுநகர் மாவட்ட கலெக்டர் அலுவலக வளாகத்தில் உள்ள மாற்றுதிறனாளிகள் நல அலுவலகத்தில் மாற்றுத்திறனாளிகளுக்கான சிறப்புக்குறைதீர்க்கும் கூட்டம் கலெக்டர் சிவஞானம் தலைமையில் நடைபெற்றது.

கூட்டத்தில் மாற்றுத்திறனாளிகளிடம் இருந்து மொத்தம் 15 மனுக்கள் பெறப்பட்டு அதில் உதவி உபகரணங்கள் கோரிய 4 மனுக்களுக்கு உடனடியாக வழங்கப்பட்டது.

பிறதுறை தொடர்புடைய மனுக்கள் மீது தக்க நடவடிக்கை மேற்கொள்ளுமாறு கலெக்டர் அறிவுறுத்தினார்.

மேலும், 2 பயனாளிகளுக்கு தலா ரூ.415 மதிப்பிலான ஊன்று கோல்களையும், 2 பயனாளிகளுக்கு தலா ரூ.7 ஆயிரத்து 240 மதிப்பிலான 3 சக்கர சைக்கிள்களையும், 2 பயனாளிகளுக்கு தலா ரூ.5 ஆயிரத்து 910 மதிப்பிலான சக்கர நாற்காலிகளையும், 1 பயனாளிக்கு ரூ.1050 மதிப்பிலான ப்ரெய்லி கைக்கடிகாரம் மற்றும் ரூ.135 மதிப்பிலான கருப்புக்கண்ணாடியையும் என மொத்தம் 7 பயனாளிகளுக்கு ரூ.28 ஆயிரத்து 315 மதிப்பிலான பல்வேறு நலத்திட்ட உதவிகளை கலெக்டர் சிவஞானம் வழங்கினார்.

இந்த கூட்டத்தில் மாவட்ட வருவாய் அலுவலர் உதய குமார், மாற்றுத் திறனாளிகள் நலத்துறை அலுவலர் சிவசங்கரன், தனித்துணை ஆட்சியர் உஷா உள்பட பலர் கலந்து கொண்டனர். #VirudhunagarCollector

விருதுநகர்:

ஒவ்வொரு விவசாயிகளின் வருமானத்தையும் வருகிற 2022-ம் ஆண்டுக்குள் இரட்டிப்பாக்கும் வகையில் மத்திய வேளாண்மை மற்றும் விவசாயிகள் நலத்துறை நாடு முழுவதும் வளரும் மாவட்டங்களாக 111 மாவட்டங்களை தேர்வு செய்து உள்ளது.

இந்த விவசாயிகளின் நலவாழ்வு இயக்கத்தின் கீழ் விருதுநகர் மாவட்டத்தில் விருதுநகர் வட்டாரத்தில் காசி ரெட்டியாபட்டி, தாதம் பட்டி, அருப்புக்கோட்டை வட்டாரத்தில் கட்டங்குடி, வேலாயுதபுரம், காரியாபட்டி வட்டாரத்தில் மறைக்குளம், முடுக்கன்குளம், தோனுகால், தோப்பூர், கழுவனச்சேரி, வழுக்கலொட்டி, திருச்சுழி வட்டாரத்தில் பிள்ளையார் தொட்டியான்குளம், முத்துராமலிங்காபுரம், புரசலூர், சவ்வாசுபுரம், நரிக்குடி வட்டாரத்தில் பூம்பிடாகை, உலக்குடி, சாத்தூர் வட்டாரத்தில் ஒத்தையால், சாத்தூர் சடையம்பட்டி, சிவகாசி வட்டாரத்தில் நெடுங்குளம், வெம்பக்கோட்டை வட்டாரத்தில் சூரார்பட்டி, ஊத்துப்பட்டி, கங்கர்செவல், வத்திராயிருப்பு வட்டாரத்தில் ஆயர்தர்மம், ஸ்ரீவில்லிபுத்தூர் வட்டாரத்தில் முள்ளிக்குளம் மற்றும் ராஜபாளையம் வட்டாரத்தில் கோவிலூர் ஆகிய 25 கிராமங்கள் தேர்வு செய்யப்பட்டுள்ளது.

அந்த கிராமங்களில் உள்ள தாழ்த்தப்பட்ட மற்றும் பழங்குடியினர் விவசாயிகளுக்கு டிராக்டர் எந்திர மயமாக்கல் உப இயக்க திட்டத்தின் கீழ் மானிய விலையில் வழங்கப்பட்டு வருகிறது.

இந்த திட்டத்திற்கு விருதுநகர் மாவட்டத்திற்கு ரூ.97.05 லட்சம் நிதி ஒதுக்கீடு பெறப்பட்டுள்ளது.

எனவே இந்த திட்டத்தின் கீழ் பயன்பெற ஆர்வம் உள்ள மேற்கண்ட 25 கிராமங்களில் உள்ள விருதுநகர், காரியாபட்டி, அருப்புக்கோட்டை, திருச்சுழி, நரிக்குடி வட்டார விவசாயிகள் வருகிற 15-ந் தேதிக்குள் உதவி செயற்பொறியாளர் வேளாண்மைப் பொறியியல் துறை, இரண்டாம் தளம், வேளாண்மை இணை இயக்குநர் வளாகம், மாவட்ட ஆட்சியரகம், விருதுநகர், அலுவலகத்தையும், சாத்தூர், சிவகாசி, வெம்பக்கோட்டை, வத்திராயிருப்பு, ஸ்ரீவில்லிபுத்தூர், ராஜபாளையம் வட்டார விவசாயிகள் உதவி செயற்பொறியாளர் வேளாண்மை பொறியியல் துறை, கலசலிங்கம் பல்கலைக்கழகம் எதிரில், கிருஷ்ணன்கோவில் அலுவலகத்தையும் தொடர்பு கொள்ளலாம்.

மேற்கண்ட தகவலை விருதுநகர் மாவட்ட கலெக்டர் சிவஞானம் தெரிவித்துள்ளார்.